يازين أمريكا

العيشة هني مضيعة وقت.. اليوم ما داومت الصبح كان عندي كم شغلة قلت أخلصهم بالبنك..

شوفوا يا جماعة.. الوطني بنك سيء.. لكنه أفضل السيئين..وهذا من واقع خبرة بالتعامل عبر القارات أيام أمريكا..

لكن يبطون الجبد! كل معاملات الفرع من نوعية "وين إذنك يا جحا".. وفرع الجابرية يحاولون يسوونه شرح بس ماكو فايدة.. نطرت ساعة ونصف بالضبط إلى أن طلع رقمي.. قلت إن شاءالله وفاء تطلعلي.. ووفاء طلعت العصر بس.. وفاء لبنانية حبوبة، ومن محاسن الصدف أنها كانت تعيش بأمريكا وولدها الآن يدرس في بوسطن اللي توني راد منها، فقعدنا نسولف عن بوسطن وحلاوتها.. وتخلص الشغل يحليلها.. وتدورلك حلول لأي مشاكل..

اليوم بعد الساعة والنصف من الإنتظار، ما مشى شغلي لضروف إجرائية غبية..

ذاك اليوم نفس الشي مع جهاز إعادة هيكلة القوى العاملة.. اللي أنا منها المفروض ويفترض أنهم يهيكلوني.. بطء في العمل آخر شيء تتوقف على ورقة سخيفة وترجع دوامك متأخر خالي الوفاض (الساعة 3 رجعت الدوام طبعاً بعد غداء مع الربع اللي كاشتين بدواماتهم).. والوقت يضيع وعادي.. مع أن الناس بالشوارع دايماً مستعيلين ويتركون..

ترى ما عندي سالفة بس ودي أتحلطم على أحد..

يازين أمريكا، كل شغلك بالتليفون وانت خالص.. الغريب في الطلبات هني.. أن كل شيء يبون منه 3!! مادري ليش.. 3 صور جنسية.. ليش بالله! يعني بيصيدون كذبتي؟ والا وحدة بتختلف عن الثانية! 3 صور من عقد العمل.. 3 كتب من التأمينات..

يالله..

=====

اليوم مسافر دبي.. مع شلة ربعي القدامى.. أيام المدرسة.. مع الدراسة في الخارج تكتشف الكثير من الإختلافات بينك وبين أصدقاء الماضي.. فأنت تتطور لكن هم لا يزالون على نفس تفكيرهم لما تركتهم.. ونفس سوالفهم.. أنا من طبعي ما أحب أقطع أحد.. فالتواصل كان دوماً موجود.. واليوم دبي! يالله تغيير جو (اللي يسمع رايح جبال الألب).. بس هي فرصة نشوف الكويتيين شيخربطون بدبي وشيحبون فيها..

=====

اليوم في طريقي للعمل بعد معاناة الوطني.. اضطريت إني أطوف على منطقة الرقة.. مع العلم إن دوامي مو هناك.. بالعكس بمكان حلو.. لكن الدرب.. المهم.. شفت منظر يضحك ويثير الشفقة.. وانيت محمل خروفين.. يمكن المشهد عادي بس ما أدري ليش ضحكت.. صورتهم.. على ما أتعلم شلون أشبك التلفون على الكمبيوتر.. ترقبوا الصورة P:

=====

السوالف بالكويت وين ما تروح.. أسهم وبورصة.. وللأسف اختربت وصرت مثلهم.. قمت أسولف عنها.. والله وناسة.. على الأقل ليما نلقالنا شي نفهم فيه..

=====

بالنهاية..

أنا الحين في العمل.. لا شغلة ولا مشغلة.. اللي كاره عمري صارلي شهر.. أحس أني إنسان عديم الفائدة.. ولا أحب هذا الإحساس..

أحس أني لا أحقق ذاتي وغير سعيد..

قالت لي أمي "منو أول ما يشتغل محقق ذاته وسعيد.. لازم تكون البداية بهالشكل".. وكذلك قال لي بعض الأصدقاء..

لكن أنا أقول إن كان التغيير بيدي.. لماذا لا أغير؟!

لاعت جبدي..

هنالك مشروع نعمل عليه أنا وبعض الأصدقاء.. إن شاء الله يمشي.. لأنه بالضبط ما أريد.. على الأقل يحسسني أني أقدم شيء.. وأحبه..

=====

عندي صديقة أحبها حب غير طبيعي..

وأحس أني مقصر تجاهها.. وصاير ما أستحي على ويهي.. ما أسأل ولا شي.. مع العلم إنها على طول على بالي.. خاصة هالأيام تارس ال iPod أغاني.. وأدري تستانس على وايد منهم..

Bo 3illiy if u ever read this.. I love u baby

:*

لازم تسمعين أغنية "يابو شعر فلة" هاب فيها هاليومين مع أغنية "وايد وايد" لمصطفى أحمد!

فتكم بعافية.. نراكم بعد دبي ;)